حسني المخلص كدوي لينا على لمسرحية بحال بحال

حسني المخلص كدوي لينا على لمسرحية بحال بحال

حسني ما غداش تكون هادي هي أخر مرة غادي ندويو معه حيت إلى بغينا ندويو على المسرح ديال الشارع فالمغرب ما كينش شي واحد حسن منو ندويو معه، او مشي غي هاكا مازال او مازال عند ما اتقل هو شاعر او شاعر كبير كعرف إلعب الحرف وركب كلمة على كلمات باش كتعطك جملة فيها ألف معنى او معنى، مشي ساهل باش بنادم اكرس حياتو لفن او خاصة المسرح ديال الشارع، ضروري ما ندويو مرة أخرى معه باش اعود لينا القصص ديالو دبا غادي ادوي لينا على أخر مشروع ديالو لهو واحد المسرحية كلش تي دوي عليها حيت الموضوع ديالها هادف بزاف كتشفو معنا اش غادي اقول لينا

 حسني المخلص او مسرح المحكور او داكشي او دكشي لاخر شكون نتومى او شكون حاكر عليكم ؟
مسرح المحكور هي تجربة مسرحية بدات في 2012 تهتم بمشاكل الناس وتعمل على تدريبهم على تجاوزها،عبر تقنيات مدرسة مسرح المقهورين لي أسسها واد البرازيلي سميتة أغوستو بوال حسني المخلص هو المدير الفني ديال الفرقة..حنا كيحكرونا كاع لي كيحكر الناس..مثلا اشتغلنا مع العيلات ديال سيدي مومن لي كيحكرو عليهم رجالاتهم، إذن حنا في العوض ما نتحكرو معاهم خدمنا معاهم باش يقاومو هاذ نوع ديال الحكرة..فينما ما كاينة الحكرة كاينين حنا.

كفاش القضية ديال مسرحية بحال بحال ؟ او اشنو هو الموضوع ديالها ؟ اشنو هي الرسالة ؟
بحال بحال هي مسرحية على الهاجرين ديال جنوب الصحراء، فيها 5الممثلين مغاربة و 5 من جنوب الصحراء، الموضوع ديالها هي المشاكل لي كايلقاو هاذ الناس في الاندماج في المجتمع ثم المشاكل الإدارية ديال لي ماعندهوم أوراق، ثم الموضوع ديال العنصرية لي كايتعرضو ليها من طرف شي مغاربة الله يهديهم، المسرحية ما فيها حتا رسالة، حنا ماشي ساعي البريد باش نصايفطو البراوات..لي فيها هو تقديم مشاكل هاذ الناس امام الجمهور والبحث مع الجمهور على حلول ليها.

 علاش كدرو هاذ العرض فالزنقة ؟ امتى غادين اكونو العروض ؟
الزنقة أو الفضاء العمومي هي أحسن بلاصة باش تتلاقا مع جمهور واسع..أصلا الناس ما بقاوش كيمشيو للمسارح، إذن حنا جبنا المسرح حتال عندهم، ثم حنا المغاربة مولفين على العروض في الزناقي بحال الهدية ولا الحلقة، هي عودة للثرات الفرجوي المغربي.
العروض غادي يكونو: شوف هاذ الفيديو فيه كلشي

 اشنو هو الدور ديال المسرح او بالضبط المسارح ديال الشارع ؟ علاش ختاريتو هاذ النوع ؟
على حساب النوع ديال المسرح، المسرح الكلاسيكي أي لي كاين من يامات أرسطو الدور ديالو هو الفرجة والتماهي مع البطل، أي الجمهور كايتنقا داخليا من المشاكل ديالو فاش كايشوف راسو في البطل و ماكيخدمش دماغو، بمعنى مسرح أرسطو مسرح تنويمي، من بعد كاين المسرح ديال بريخت لي هو المسرح الملتزم لي فيه الجمهور يقدر يتفاعل عاطفيا مع البطل ولكن ما كينعسوش، بالعكس تا يدير ليه أرارة في راسو باش يخليه يفيق شوية مع شنو واقع، هنا الدور ديالو هو التوعية و، الإضافة ديال في مسرح ديال المقهورين هو الجمهور ممكن يتفاعل مع الأبطال لكن هوما لي تيقلبو على حلول بل الأكثر من ذلك الجمهور تايجرب حلول بيه فيه عبر المشاركة في المسرحية من خلال بزاف ديال التقنيات أهمها مسرح المنتدى أو الطياطر فوروم، هنا الدور ديال المسرح هو تدريب الناس على تغيير وضعياتهم..ومسرح الشارع لي عندو هدف اكثر من مجرد الفرجة تاي ينطبق عليه هاذ الهضرة كلها لي قلت.
اختارينا هاذ النوع ديال المسرح لأننا نعتقد أن هاذ البلاد ما غاديش تزيد القدام إيلا الناس مافهموش أنهم هوما قادرين يغيرو وضعيتهم بلا ما يتسناو شي واحد آخر يجي يغير ليهم، التغيير تايبدا من راسك ماشي من راس الحمق..وشكرا

1891077_965963390080983_6168977331202773255_n11000630_989056084438380_447867267854420318_o

No Comments

Post a Comment